الملفات والـ Users والصلاحيات

أهلاً بيك. النهاردة هنتكلم عن حاجة هتقابلها في كل خطوة في الأمن… الملفات والصلاحيات.

كل حاجة على الجهاز محفوظة في ملفات. والملفات مِتْرَتِّبة جُوّه folders، زي الأدراج في الدولاب. والعنوان اللي بيوصلك لملف معيّن اسمه path.

في Linux، الـ path بيبدأ بـ slash، وبعدين أسماء الـ folders ورا بعض. وفي Windows بيبدأ بحرف الـ drive، زي C، وبعدين backslash. وفيه ملفات مهمة قوي للمهاجم، زي ملف الـ users في Linux… etc slash passwd. طيب مين يقدر يفتح الملفات دي؟ هنا ييجي دور الـ users. كل واحد بيستخدم الجهاز ليه user، وكل user ليه صلاحيات. زي الموَزَّفين في شركة: مش كل واحد يقدر يفتح كل الأوض.

وفيه نوعين مهمين من الـ users. user عادي، صلاحياته محدودة. و user صلاحياته كاملة: اسمه Administrator في Windows، و root في Linux. وهدف المهاجم في الآخر غالباً إنه يوصل للـ user ده.

والصلاحيات على الملف تلات أنواع أساسية: read، يعني تقرا الملف. write، يعني تعدّل فيه. و execute، يعني تشغّله كبرنامج. وغلطة صغيرة في الصلاحيات دي ممكن تفتح باب كبير للمهاجم. مِسال: لو ملف بيتشغّل بصلاحيات root، وأي user عادي يقدر يعدّل فيه… يبقى أي حد يقدر يكتب جُوّاه أوامر، والأوامر دي هتتنَفِّد بصلاحيات root. وده من أشهر الطرق اللي هنشوفها في كورسات Privilege Escalation. تعالى نعمل نِزام صلاحيات صغير بـ Python. dictionary فيها كل user، وقدامه الحاجات المسموح له يعملها. نشغّل… أحمد مسموح له يقرا بس.

permissions = {
    "ahmed": ["read"],
    "admin": ["read", "write", "delete"],
}

print(permissions["ahmed"])

['read']

ونعمل function اسمها can، بتسأل: الـ user ده مسموح له يعمل الحاجة دي ولا لأ؟ نشغّل… أحمد مش مسموح له يمسح، والـ admin مسموح.

permissions = {
    "ahmed": ["read"],
    "admin": ["read", "write", "delete"],
}

def can(user, action):
    return action in permissions.get(user, [])

print(can("ahmed", "delete"))
print(can("admin", "delete"))

False
True

دورك: ضيف user جديد اسمه sara، مسموح لها read و write، واسأل: تقدر تعمل write؟

الحل: سطر في الـ dictionary، وسطر print. نشغّل…

permissions = {
    "ahmed": ["read"],
    "sara": ["read", "write"],
    "admin": ["read", "write", "delete"],
}

def can(user, action):
    return action in permissions.get(user, [])

print(can("ahmed", "delete"))
print(can("admin", "delete"))
print(can("sara", "write"))

False
True
True

الدرس الجاي: الكمبيوتر بيشوف كل الحاجات دي إزاي؟ أرقام… صفر وواحد. يلا بينا.