أهلًا بيك: يعني إيه backend، والكورس ده ماشي إزاي

أهلًا بيك. الكورس ده مش من الصفر، ده من تحت الصفر. يعني لو عمرك ما كتبت ولا سطر برمجة، إنتَ في المكان الصح. ولو إنتَ مبرمج أصلًا، هنوصل سوا لحاجات بيشتغل بيها مهندسين الـ backend في شركات كبيرة، خطوة خطوة.

تعالى نبدأ بأهم سؤال: يعني إيه backend؟ لما بتفتح أي تطبيق على موبايلك، الشاشة اللي قدامك اسمها frontend. بس الشاشة دي ما تعرفش حاجة لوحدها. كل ما تدوس على زرار، الشاشة بتبعت رسالة لجهاز تاني بعيد، والجهاز ده بيرد عليها. الجهاز البعيد ده اسمه server، والبرنامج اللي شغال عليه هو الـ backend.

تشبيه بسيط: إنتَ في مطعم. إنتَ الـ frontend، قاعد على الترابيزة. الجرسون بياخد طلبك ويروح بيه للمطبخ، وده الـ request. المطبخ هو الـ backend، بيجهّز الأكل. والأكل اللي راجعلك هو الـ response. والمطبخ ده بيخدم مئات الترابيزات في نفس الوقت، ولازم ما يغلطش في ولا واحدة. وده بالزبط اللي هنتعلمه. دلوقتي أول سطر. الملف ده اسمه main dot js، والـ js معناها إنه مكتوب بلغة JavaScript. وهنكتب فيه سطر واحد: console dot log، وده أمر معناه: اطبع الكلام ده على الشاشة. ونشغّله.

console.log("أهلًا من الـ backend");

$ node main.js
أهلًا من الـ backend

بص على الشاشة اللي على اليمين. أول سطر هو الأمر اللي اتكتب: node main dot js. و node هو البرنامج اللي بيشغّل JavaScript على أي جهاز، من غير متصفح. وتحته الكلام اللي طبعناه. مبروك، إنتَ شغّلت أول برنامج. طب الـ request شكله إيه من جُوّه؟ في الحقيقة هو كلام مكتوب، بس جُوّه البرنامج بنمسكه كـ object، يعني شنطة فيها معلومات، كل معلومة ليها اسم. method، يعني نوع الـ request: هنا GET، يعني هات. و path، يعني الحاجة اللي عايزها: slash courses. نشغّل ونشوف.

// ده شكل request جاي من المتصفح
const request = {
  method: "GET",
  path: "/courses",
};

console.log(request);

$ node main.js
{ method: 'GET', path: '/courses' }

الـ object اتطبع زي ما هو، بالـ curly braces، وجُوّاه الاتنين. ما تقلقش من شكل العلامات دي دلوقتي، هنفهم كل علامة فيهم في الدروس الجاية بالتفصيل. دلوقتي أهم حتة. الـ backend في الآخر function، يعني آلة: بتدخلها request، وبتطلعلك response. هنكتب function اسمها handle. لو الـ path هو slash courses، ترجّع status two hundred، يعني تمام، ومعاه list بالكورسات. غير كده، ترجّع four oh four، يعني مش موجود. وتحت بنجرّبها مرتين: مرة بـ courses، ومرة بحاجة مش موجودة. نشغّل.

const request = {
  method: "GET",
  path: "/courses",
};

// الـ backend: بياخد request ويرجّع response
function handle(request) {
  if (request.path === "/courses") {
    return { status: 200, body: ["Node.js", "PostgreSQL", "Redis"] };
  }
  return { status: 404, body: "مش موجود" };
}

console.log(handle(request));
console.log(handle({ method: "GET", path: "/cats" }));

$ node main.js
{ status: 200, body: [ 'Node.js', 'PostgreSQL', 'Redis' ] }
{ status: 404, body: 'مش موجود' }

أول response: status two hundred ومعاه التلات كورسات. التاني: four oh four، مش موجود. وده بالزبط اللي أي server في الدنيا بيعمله، بس بشكل أكبر: بيستلم request، بيقرر يعمل إيه، وبيرجّع response برقم status وبـ body.

قبل ما نكمل، خليني أقولك كل درس ماشي إزاي. الأول بنفهم المشكلة، وليه حد محتاج الحاجة دي أصلًا. بعدين مسال صغير بيشتغل بجد قدامك، كل ناتج بتشوفه طالع من برنامج اشتغل فعلًا. وبعدين تحدي، والتحدي هلزقهولك بالتفصيل في كومنت جُوّه الملف: الهدف، والخطوات، والشروط، وحالات الاختبار، وتلميحات. وبعد ما تحل، بنشوف الحل سوا.

والتحدي ليه شكلين. تحت الدرس هتلاقي سطر قصير بيفكرك بالمطلوب. وجُوّه الملف هتلاقي الكومنت الكامل. والكومنت ده أي سطر بيبدأ بـ two slashes، و JavaScript بتتجاهله خالص، يعني مش بيغيّر حاجة في البرنامج. فدايمًا اقرا الكومنت للآخر قبل ما تبدأ. أول تحدي ليك. زوّد على handle صفحة جديدة: slash me. ترجّع status two hundred، والـ body يبقى اسمك. وتحت، زوّد سطر بيجرّبها. لزقتلك التفاصيل كلها في الكومنت تحت.

الحل. نسخنا if بتاعة courses، وغيرنا الـ path لـ slash me، والـ body لاسم. وحطيناها قبل سطر four oh four، لأن الـ function بتقف عند أول return. وتحت زودنا سطر التجربة. نشغّل.

const request = {
  method: "GET",
  path: "/courses",
};

// الـ backend: بياخد request ويرجّع response
function handle(request) {
  if (request.path === "/courses") {
    return { status: 200, body: ["Node.js", "PostgreSQL", "Redis"] };
  }
  if (request.path === "/me") {
    return { status: 200, body: "أحمد" };
  }
  return { status: 404, body: "مش موجود" };
}

console.log(handle(request));
console.log(handle({ method: "GET", path: "/cats" }));
console.log(handle({ method: "GET", path: "/me" }));

$ node main.js
{ status: 200, body: [ 'Node.js', 'PostgreSQL', 'Redis' ] }
{ status: 404, body: 'مش موجود' }
{ status: 200, body: 'أحمد' }

التلات responses زي حالات الاختبار بالزبط. الدرس الجاي: قبل ما نكتب أي برنامج كبير، لازم تعرف تتحرك على جهازك زي المبرمجين، من الـ terminal.